沖涼既時候，次次都會思潮湧現。
我冇刻意去諗咩，但靈感就不由自主彈出黎。
點解沖涼先會？沖涼有咩咁特別先？
沖涼既時候......有水！
好，水，算係幾特別，可以造下文章。
一：水有流動既性質
二：水向下流
結論：當水由我頭頂向腳指流落地下，連靈感都沖埋出黎。
完美。
咁飲水點解冇靈感？
拿，沖涼既水，都係身體外面流；
將呢股靈感之泉飲落肚，唔係應該更有效咩？
但係我從來未試過飲下水就成個人醒哂喎...
如果水得?可樂得唔得?冬0T得唔得?(冬0T都唔知係乜?去茶餐廳過地道港燦生活，見識下)
酒就實得，不過次次要寫就要飲既話，容乜易好似李白咁死法。
搵到個令自己有靈感既方法係好事...
但係，沖涼未免太麻煩，
如果係簡單d，方便又易做既就好喇。
想當C朗，
想當李嘉誠，
想當明星，想當首富；
有車有錢有女人，閃爍的鎂光燈。
Honey gold jewels money women wine cars that shine
別人的生活七彩繽紛，
自己的總是索然無味；
每一個人，就算礙於面子不敢說出口，也總會渴望：
「假如我是某某，該有多好...」
如果我係湯漢斯，下半世唔駛憂喇...得閒拍兩部戲，名利雙收...
最好都係做John Squire，彈得一手好結他，又做過top band，樣子唔係太特出，但有音樂才華就叫有型架啦。呃得下人架。
你曾否有如此想法？
我？我有...
所以而家好慚愧...
你睇人好，人睇你好。
別被鏡頭前的綺麗所瞞騙，那只是糖衣毒藥。
是的，當一個搖滾明星的時候，是渡過了一個好時光；
數千萬英鎊，遍佈全球億計的fans，
唱片公司不敢開罪你，還得送你勞斯萊斯名車，哄你高興，免得你一個不如意寫歌把公司的糗事全擺出來，還光明正大地以公司的名字作歌名。（實際上是有人做過了，ＥＭＩ，唔知好嬲定好笑）隨心所欲，要風得風，可卡因、海洛英、esctasy、LSD、acid，仲有Guinness、乜啤乜啤任你飲，醉死係威士忌樽亦唔出奇。
對政府有不滿？覺得westlife音樂係垃圾？
無問題，搖滾明星咩都可以講出口。
名氣，從來唔係一條忠心既狗。
要走就走，帶走所有雲彩。
身邊沒有保安，沒有成堆的記者；
白粉？游泳池？
一無所有。
做第二個人，係唔係真係一件好玩既事？
後悔，想重新開始，未免太妄想。
只能安慰自己，起碼，也曾有個好時光。
Noel Gallagher版本，多一份傷感...
The Jam - TO BE SOMEONE
To be someone must be a wonderful thing
A famous footballer a rock singer
or a big film star, yes I think I would like that
To be rich and have lots of fans
have lots of girls to prove that I'm a man
And be No. 1 - and liked by everyone
Getting drugged up with my trendy friends
They really dig me, man, and I dig them
And the bread I spend - is like my fame - it's quickly diminished
And there's no more swimming in a guitar shaped pool
no more reporters at my beck and call
no more cocaine it's only ground chalk
no more taxis now we'll have to walk
But didn't we have a nice time -
didn't we have a nice time
Oh wasn't it such a fine time
I realize I should have stuck to my guns
instead shit out to be one of the bastard sons
and lose myself - I know it was wrong - but it's cost me a lot
And there's no more drinking when the club shuts down,
I'm out on my arse with the rest of the clowns
It's really frightening without a bodyguard
so I stay confined to my lonely room
無題，在老夫子漫畫裡出現過上千次。
Untitled，是在windows save files時才首次接觸的。
那時還很笨，誤以為是United。
多謝燈神。
能夠識到一個會整芝士蛋糕既人已經唔易，
整好仲係送俾我既，更加係三世修來既福氣。
星期日，某人提及天生一對。
天生一對，如果淨係講樣，似乎太唔公平。
畢竟，樣係天生既，唔係人可以後天改變既事。
當然你可以整容化妝，不過呢種假膠人，我唔當佢係人喇。
(fake plastic people下話，係由radiohead既fake plastic tree悟出黎既道理，我非常主觀地認為，Thom係講緊呢回事!)
如果由一樣，不能被控制既因素，黎決定是否天生一對，未免太唔理性。
亦都帶黎好多不必要既爭吵，吵吵下就分手，幾唔抵。
所以我覺得，應該由你地既行為、性格黎睇。
例如男朋友鍾意聽歌，女朋友鍾意唱歌、
男朋友鍾意人地食野既幸福相，女朋友鍾意享受食物帶俾佢既幸福感覺...
喂，唔係天生一對，咁點算？
咁人夾人緣，咁岩撞唔正都唔駛怨架...
有時候，愛一個人，就要做d你唔鍾意做既事架啦。咁先有趣味既。
(唔好意思，呢句我係抄既，九把刀先生既<<殺手>>，翻睇，仍然好熱血，好精彩。)
冬天著衫都有學問，
你係要著得多衫，但又唔可以太多；
著完，仲有少少寒意，就完美喇。
話哂都係冬天丫，唔打冷震點得呢？
琴晚見到食環署清潔工人，９點幾仲未收工。
其實每晚探完雷，行返屋企都會見到佢。
經濟好轉，企業家吸金，勞動階層丁點著數都攞唔到。
當勞話，生意佬呀生意佬，有良心既咪加下人工咯。
痂人說夢。
生意佬只會看在錢既分上姐，良心？錢咪係良心咯！
天星碼頭，有人話示威者癲癲地，政府都諗好哂啦反乜９。
..............
明白...
難怪，香港仲未有民主........
p.s. 手指凍到硬哂，彈唔到結他喇...
每日都趕著返校，每逢運氣稍差 ，遇著紅燈，就心中暗罵：「平時又唔見你咁多車，好多唔多而家先黎多。」就好似「平時又唔見你去讀書，好讀唔讀而家先黎讀。」，百搭句式。夠膽既更可以加多一句「你有本事就同我再多車啲丫！」，通常都會應驗；平時六合彩又唔見我中，好中唔中而家先黎中。
記得有一次，毛毛細雨，某人甫踏出校門，為自己神機秒算無帶遮而洋洋得意：「都唔係好大雨啫」。霎時風雲大作，天地變色，落狗屎，某人變成落湯雞。玩笑唔好亂開。
今日，仍然好趕，仍然紅燈。準備鬧兩句既時候，擰轉頭，望見一堆草。
事實上，佢地唔應該叫做草。有手臂咁高既莖，半隻手掌咁大既葉。佢地係馬路旁邊負責營造大自然氣息既老臨，一大堆老臨。香港，除左高速公路，週圍都係，有咩咁特別？佢地似乎個個都一樣，莖，葉，花；但似乎個個都與眾不同。
佢有９塊葉，塊塊飽滿，仲有點點雨水；係，佢係好矮，但，個一刻，佢突然間變得好高，你知道，就好似朱自清阿爹。點解佢地既生命可以咁美麗？點解我地每日都係營營役役，日復日，都無意思去搞清楚自己做緊乜野？你話草既生活無聊呆板，人又好得去邊？
對於草，佢地終極目標就係要孕育後代，就此而已；人呢？有幾多個知道自己既終極目標？賺錢，賺左呢？買豪宅，買左呢？買靚車，載靚老婆，去ball場，識下名人，再賺錢。
咁你既目標係賺錢？得到一堆物質又如何？人死歸故土，唯有精神不滅。草，比人類更高明。
十月下旬，秋風起。風，係生命力既表現。落葉漫天飛舞，就連頭髮，衣服亦都按捺不住。想跳舞，想高歌，每一縷風都穿過你既皮膚，你可以感受到風既流動；你知道，呢一陣風既經歷，比起你個人實在大得多，大得多。單單係站在風既中央，身體靜止不動，卻好似經過千千萬萬既國家，嘗盡歷史洪流上經年不衰的情感。
Words are flowing out like endless rain into a paper cup
They slither wildly as they slip away across the universe
世界係幾咁美好。
Nothing's gonna change my world
John Lennon 一首被違忘既歌，Across The Universe
我成日經過粉嶺火車站。
由聯和墟去火車站，通常都會過十字路口，
入去隧道，
轉左轉右，
上長命斜，
過左消防局對開條行人路，
你就會上停車場條樓梯。
好，條樓梯就係戲肉喇。
如果你唔係眼生癬，你點都會留意到，
樓梯底有個凹位，
凹位有個老人家，
太陽升起，佢就坐；
太陽落山，佢就訓；
每一次行過，都好想坐低傾一傾。
點解會自己一個流浪街頭？食乜？
都唔一定係傾呢種問題既。
總之，佢絕對係一個教到我好多野既人，
而我，對佢黎講，應該係一條煩膠，唔係黎俾錢佢捱落去既煩膠。
可惜我自己怕事，唔敢學下蘇格拉底，失驚無神拉住廣場既人傾計。
學成之日，變成不折不扣既傻佬...
因為每一次都見到佢，習以為常，認為自己總有一日，可以認識呢個人...
最近，有冇去過粉嶺火車站？
十字路口、隧道、長命斜、行人路、
樓梯。
樓梯再唔係你所熟悉既樓梯。
凹位被封死了。
「工程進行中」
觸目驚心。
只係封死該位置。
巧合到，就好似，為左殺死個位老人家，
而搵塊板封實。
佢死左？
佢走左？
今個星期六，東華又出show，
一出ｓｈｏｗ就轉涼，年年都係咁。
捐款捐款，係咪真係幫到人？
俾班總理出哂行政費，邊個知？
去山區學校，幫到既，係咪真係個班兒童？
我覺得，得益者始終都係去個班友。
幫人，其實幫緊自己姐。
去山區，去上一堂課姐。
係,我首歌既版本係咁既
Head & shoulders, knees "啪" toes
knees "啪" toes
knees "啪" toes
Head & shoulders, knees "啪" toes
OH SHIT....乜叉事呀...
由knees 去到 toes， 菠蘿蓋都會啪一聲。十足老人家。
再黎,我地可以認真少少。頭，會唔會覺得有些少痛呢?
肩膊，成日都酸酸軟軟；
菠蘿蓋，更加唔駛講，佢啪啪聲大到你行去廚房炒飯都仲聽到；
腳指，斷估你都唔會斷左隻腳指咁誇張，但你可能會發現捆哂黑邊，非常嘔心，heart-vomiting。
不愧係身體檢查之歌...
據聞首歌有較長既版本，但係我唔敢搵命搏。跟住黎做，可能會發現自己時日無多。
有死士做左既話可以通知我。
已有多年沒到身體檢查了。小時候，每逢身體檢查和牙齒檢查將至，都像如臨大敵般，徹徹底底地把牙齒擦亮，不斷跳繩增高，剪指甲；過後又把一切拋諸腦後。
所謂十八歲，卜卜脆，後生仔身體最壯健，哪需婆婆媽媽的去做爛鬼身體檢查？而且，作為一個頗為傳統的中國人，實在很難接受定期身體檢查這一套。正如高達駕駛員阿寶所說，明明行得玩得，竟然去醫院檢查！？大吉利是！
有否聽過這首兒歌？
Head, shoulders, knees and toes, knees and toes
Head, shoulders, knees and toes, knees and toes
and eyes and ears and mouth and nose
這可是非一般的兒歌，你可以嘗試照著做。來吧，頭，肩膀，膊頭，腳趾...很驚訝吧?
不?
再做。
還沒發現嗎?
再做。
發現了沒有?
------待續
阿爹對我十分好。
他知道我熱愛音樂，熱愛香港，每逢電視出現結他或披頭四的歌曲，他都會喚我去看。今天三色台某劇集出現了女主角自彈自唱yesterday的情節，我呆在房裡與豬柏屎搏鬥，緣慳一面。阿爹說，yesterday是名曲，彈結他的人都應該學懂此曲。
好吧，我實在對yesterday不存好感。我不相信昨日，我愛活在當下。I don't believe in yesterday, let's be here now. 保羅麥卡尼後期的歌曲，我實在不敢恭維。Yesterday已是一例。Hey Jude也如是。雖說hey jude是麥卡尼先生寫給約翰連儂的兒子，意義深遠；話說連儂與 Cynthia Powell離婚，麥兄閒來無事，去探訪他們所生的兒子Julian，途中作了hey jude一曲，以鼓勵Julian走出陰霾，Jude就是Julian的暱稱。值得一提，Julian 要到20年後才發現hey jude與他的關係。
yesterday，hey jude，michelle，每一首都能夠入選所謂的披頭四經典精選，或，披頭十大好歌；它們令披頭四街知巷聞；但每一首都不能算是披頭四的歌曲。你不能找出任何披頭四的影子，極其量只是動聽的ballad。這些歌由誰唱都可以。它們應該被稱為保羅麥卡尼的歌，而非披頭四的歌，更為合適。
不過我仍然感謝我老爹，他總是把我放在第一位...或許沒這麼高，但也總能打進十名以內。
個多鐘頭後，老爹又再一次以行動證明我的位置。
這次是Ｂ哥。
鍾鎮濤，Kenny Bee。
我只知道B哥是溫拿樂隊的其中一員，今晚總算捱過破產的日子，在勁歌唱新歌。先談談他的結他，就算我認識不多，也知道它是我老婆仔的近親，大約是cs 356 + es 175的模樣吧...
再談歌－－日日是好日。不太認真又不太專心，沒留意歌詞，只記得「日日是好日，信我」，所以先擱置。演出方面，大概由於有一隊Live band支撐，Ｂ哥把結他明顯地調低音量，只彈兩下交戲，唉，浪費浪費。歌曲，特別是開首，有一種rolling stones的classic rock味道，但Ｂ哥唔夠氣，唉，浪費浪費。希望有機會可完整地把全曲聽一遍，好為Ｂ哥平反平反。
日日是好日...明早又要完成一份practical skill...唔慌唔好日......
香檳超新星呢首歌 ，可以話係Noel老大胡扯功力既頂峰之作。香檳同超新星,唯一既關係，就係大家都有九個字母。而綜觀成首歌既歌詞,根本係冇一句講得通，合邏輯。"Slowly walking down the hall / Faster than a cannon ball" 行得慢，但又要快過炮彈,你估玩緊metal slug咩。而個一句"Caught beneath the landslide"，Noel聲稱係睇到女朋友屋企廚房既樽，有感而發既歌詞，更加係不明所以。
一直以黎，無論Liam唱呢首歌唱得幾咁投入(飲到爛醉)，場面影得幾咁迷幻（Earls court 95，好似魚眼望水面既感覺）， 我都對呢首歌毫無感覺。想當年， (What's the story) morning glory大碟得手後，聽哂所有歌，覺得champagne supernova格格不入，開頭既海浪聲係咩一回事？
直到某一個星期六下午，自己一個看門口，閒著沒事幹，開左啤酒，又聽多一次隻碟。當日係香港久違既秋天，二十幾度，涼風陣陣，我坐係梳化，聽住Morning Glory既電台對話聲漸遠，慢慢，傳黎一陣似曾相識既海浪聲，一段相當溫柔既結他riff，同漸漸清晰既木結他，伴隨住Liam一慣懶散既嗓音，似乎係好遠好遠既地方傳過黎。
當我們喝得爛醉時，你在哪?我真係唔知，當時屋企似乎唔係我一向熟識既屋企，Alan White愈見急促既鼓聲，催促我去尋找個班曼徹斯特既老朋友。的確,佢地係一望無際既沙灘上面。沙灘，夕陽， 啤酒, 隨住paul weller同 Noel既結他solo, 我地愈飲愈多。身體就好似，係海面上飄盪，浮浮沉沉。有數個海浪翻過，我地被捲入海中，啤酒樽，梳化，電視機，扭曲成旋渦狀既渾合物，慢慢我都成為其中之一，但咁又如何呢？世界依然冇停止轉動。
